Haritz amerikarra

Deskribapena

Haritz amerikarra edo gorria zuhaitz hostoerorkorra da. Hosto (10-25 x 7-20 cm) sinpleak ditu, gingildunak, eta gingilak puntadunak dira. Hostoen ertzak osoak dira, baina gingilen kanpoaldean horzdunak. Nerbioen ondoan, ileak izaten dituzte.

Landare monoikoa da. Lore arrak (5-12 cm) gerbatan antolatuta egoten dira, eta hori-berdeak izaten dira. Emeak, berriz, globo-itxurakoak dira, eta adarretan atxikiak egoten dira. Azpialdean berdeak dira, eta, gainaldean, gorriak. Haren fruitua (20-30 mm) ezkurra da, ezkur zabal eta sendoa.

Azal leuna izaten du gaztetan, eta, urteekin, pixka bat arrailtzen da; ez asko, ordea. Kolore arre grisaxka dauka.

Jatorria

Ipar Amerikako ekialdea

Loraldia

Maiatza-ekaina

Tamaina

20-40 m

Kudeaketa

Haritz mota honen landaketak 60 eta 80 urte bitartean botatzen dira, eta egurra zerrategietara bideratzen da.

Oharrak

Ez nahasi bertako haritzekin. Amerikarraren hostoek gingil puntadunak dituzte, eta ezkur zapal eta handiak.